الحذر عند تغيير سير مكينة هوندا اوديسي .

17 5

لايمكنك التصويت حتى الحصول على 20 نقطة على الأقل
إضغط هنا للإخفاء

amer ahmed 566
قبل 5 سنه و شهر

السلام عليكم،

اشترينا سيارة هوندا اوديسي 2010 لصديق لي .

السيارة كانت نظيفة جدا و ممشاها ممتاز ، فقط 160,000 كم.

و اشتريناها من شخص نعرفه و عارفين تاريخ السيارة.

كنا عارفين انه سير التايمن تبع السيارة يتغير كل 80,000 او 100,000 كم،

و صاحبها ما غيره .

فمن باب الاهتمام حرصنا على تغييره حتى لا يقطع و يسبب مشاكل كبيره مستقبليه.

و اعرف ميكانيكي ممتاز جدا خصوصا في سيارات الهوندا، كلمناه على أساس نسلمه
السياره و كان وقتها في رمضان قبل العيد ، و كان عنده زحمه فرفض يستقبل السياره،
و كان يقلنا انتظروني الى ان اخلص بعض السيارات اللي عندي،

و لكن بسبب انه صاحبي كان مستعجل و كان يبغى يسافر فيها فترة العيد و ديناها لميكانيكي
ثاني و مدحوه لنا و في ورشته شفنا عنده سيارات مختلفه و اغلبها سيارات غاليه.

الشاهد طلب مننا نجبله سير تايمن + شدادات ، و بعدها طلب شداد السير الخارجي.

كنا قد قرينا في الكتاولوج او في موقع خاص بصيانة السيارة انه لازم في السيارة هذي

اذا بتغير سير التيمن لازم تغير معاه الشدادات + طرمبة الموية.

كلمناه و قال مايحتاج تغير طرمبة الموية لأنها سليمة ، قلنا له غيرها افضل ، اصر انه
ماله داعي و زياده مصاريف خصوصا انها غاليه.
للأسف مشينا على كلامه و كلها شهرين و يقطع سير التايمن بسبب انكسار بكرة طرمبة
الموية و ضرب السير في البلوف لانه السير رابط مع بكرة الطرمبة للأسف من الداخل!!

و دخلنا في موضوع توضيب حيوصل لمبلغ 5000 ريال بسبب توفير قطعه كانت قيمتها اعتقد 800 ريال فقط.

فرجعت للميكانيكي المتخصص في الهوندا ، و قلي بالفعل انا اذا اشتغلت في السيارة هذي
و حغير سير التايمن لازم اغير معاها الشدادات و أغير معاها الطرمبة حتى لو سليمة،

لانه الطرمبه غير انه ممكن بكرتها تنكسر ، برضه ممكن تخرب بعد فتره و تدخل في تكلفة اصلاح و فك من جديد
خصوصا انه موقعها صعب مو سهل.

فالحذر لأصحاب هذي السيارة من الوقوع في هذي المشكلة ، و اعتقد انه بعض مكاين هوندا
اكورد ال سته سلندر بنفس الطريقة .

و ايضا دائما ودي السيارة للميكانيكي المتخصص فيها حتى لو كان سعره اغلى و لكن يريحك و
في الاخير يوفر عليك و حيكون هو ارخص من واحد يصلح حاجه و يخرب حاجة ثانية.

إبلاغ

الردود