افضل كفرات موجوده بالسوق

اخوي ركب كفرات ميشلان هي حقت الاكورد من الوكاله 

 افضل واذا كانت غالية عليك عندك هنكوك حلوة ورخيصة تقريبا وشكرا.. 

هانكوك حلوه ولينه ورخيصه

السلام عليكم

افضل الانواع 

بريلي 

ميشلان

كونتينتال 

برجستون

يوكوهاما

تويو 

يوكوهاما

هانكوك 

مارشال 

سوتوميتومو

وست ليك 

نما 

تحياتي لك

والله انا غيرت للكامري جنط ١٦يوكوهاما ع ٣٤٠ للحبه والهانكوك ب٢٥٠ 
واخوي معهه لكزس كفرات الوكاله يوكوهاما وغير وركب هانكوك
وتحسفت لو مركب هانوك سعر رخيص واحسن ليونه 
عكس اليوكوهاما قاسيات شوي 
اذا ماهمك السعر اقولك ركب مشلان صراحه مركبهن جديده بتاريخ ٢٠١٢ 
وللحين ع الموتر والوطيه نظيفه ولا ينقص الهواء ما شاء الله 
طبعا غيرت الامام فقط

الحيره بعينها ↑ ↑ ↑ ↑ ههههههههههههههههههههه 

وش رايكم بكفرات ماكسس يا شباب؟

ماكسس تايلندي طيب و سعره زين
ركبته مقاس 16 على ناتيفا و مريح و لا يطلع اصوات

إذا تبي أفضل شيء و رساوه ممتازه لا تركب غير:
"ميشلان، بريدجيستون، بيريللي"

إذا تبي كفرات جيده و لينه و سعرها متوسط و رساوه متوسطه:
"هانكوك، تويو"

إذا تبي كفرات رخيصه و رساوتها دون المتوسطه:
ماكسس، جيني، سايلون، رابيد، سونار

الافضل هونكوك رخيص وعملي انا ركبت 3 كفرات صينية  
وواحد هونكوك قبل سنتين الاصينية تقريبا كلها ممسوحة  
والهونكوك باقي فيه نص عمر 
اما اذا تبغى كفرات جيدة و مايهمك السعر ركب 
مشيلان او برجستون او كوننتنتال او يوكوهاما 
هذي اجود الكفرات اللي اعرفها 

أخوي  الكفرات بحر غزير المعلومات  لو تكلمت فيه مايكفيني  حتى 100 سطر

لكن أنا بختصرها لك و بعطيك اياها من الآخر
  
ولاتعتمد على كلام واحد يذكر اسم شركة بدون  مايذكر اسم نقشة
 لأن المواصفات والجودة تختلف بين انواع كفرات الشركة نفسها 

>>> جرب كفرات جوديير  لكن نقشة اسمها افيسينت قريب بيرفورمانس

ومتأكد راح تدعيلي  إن شاء الله  وإذا ماعجبك علمني عشان احلق شنبي وارسلك صورتي املط ههههه

بس تأكد  تكون كفرات جوديير  واسم النقشة مثل ماذكرت EFFICIET GRIP PERFORMANCE

وهذي تقييمات المستخدمين على موقع جوديير نفسه :

https://www.goodyear.eu/en_gb/consumer/tires/efficientgrip_performance.EFFIGRIPPE.html

__________________________________________________________________________________
وهذا مقطع فيديو دعائي لمميزات الإطار :

https://www.youtube.com/watch?v=pBL8xyYW4UM


وهذا موقع مستقل فيه تقييمات المستخدمين :

http://www.tyrereviews.co.uk/Tyre/Goodyear/EfficientGrip-Performance.htm
_______________________________________________________________
مزايا هذا النوع من جوديير  رساوة وثبات وراحة وهدوء ومسافة توقف أقصر عند الفرملة المفاجئة

لكن مستوى الهدوء والراحة يختلف من مقاس لمقاس في الكفرات عموماً حتى لوكانت نفس النقشة

يعني انت مثلاً ارتفاع الكفر عندك 55  ماراح يكون الهدوء والراحة فيه مثل ارتفاع 60

لأنه الجنط عندك كبير مقاس 17 مقارنة بالأكورد اللي عندي مقاس الجنط 16 والارتفاع 60
________________________________________________________

عموماً الكفر هذا ممتاز وشركة جوديير أمريكية لكن النوع هذا تحديداً مصنوع في ألمانيا

وأرخص من الميشلان  برغم مزاياه الكثيرة لكن اكيد عمره اقل من الميشلان

لكن وش تبي بالعمر الطويل إذا كانت المزايا اقل

انا عندي طقم ميشلان  انتظر متى ينتهي عمره الإفتراضي واركب طقم جوديير لكن مهو راضي يستسلم  هههه

بالتوفيق لك  وأي استفسار إضافي أنا حاضر 

نسيت اذكر مقطع الفيديو فيه موسيقى .

كفرات جوديير عموماً ممتازة  وأغلب من جربها يمدحها 
صحيح إني ماجربت هالنقشة لكن كل المجربين تقريباً يمدحونها 

وكان عندنا جمس كان راكب عليه جوديير نقشة ثانية طبعاً وكان ممتاز جدًّا

الله يعطيكم العافية جميع وبيض الله وجيهكم 
قررت اني اخذ ميشلان بس عندي اشكالية بالتاريخ لقيت 2015 

بس واحد يقولك 25 اسبوع واحد يقول شهر ثلاثه كم المفروض اخذ وسلامتكم

يارجل كل ذا الكلام عن الجوديير ومااقنعتك؟ 

طيب براحتك خذ ميشلان برغم انه غالي

 وتاريخه ممتاز 25  أسبوع من قالك شهر ثلاثة؟  داخل على شهر 6 يعني منتصف 2015

يعني احدث تاريخ ممكن ومااتوقع تلقى تاريخ احدث من كذا  حالياً

لكن انصحك بنقشة افضل من النقشة اللي تجي على الأكورد شد بلد 

النقشة اللي تجي على شد البلد اسمها ميشلان انيرجي سفر وصناعتها تايلندية على مااعتقد

فيه نقشة ثانية من ميشلان  اسمها برايماسي اتش بي  >> PRIMACY HP

هذي النقشة اكثر راحة  من الانيرجي  وشكلها حلو وصناعة ألمانية 

وعلى فكرة تجي هذي النقشة على الأكورد ال6 سلندر من الشكل الجديد